|
Türk Xalqlarının Ümumdünya Assambleyası, Dünya Azərbaycanlıları Konqresi və Qazaxıstanda Yaşayan Azərbaycanlıların Etno-Mədəni İttifaqı Şəhidlər Xiyabanını ziyarət edərək, sonra Azərbaycan Respublikasının Milli Qəhrəmanı Mübariz İbrahimovun anadan olduğu Biləsuvar rayonnun Əliabad kəndində yerləşən evini də ziyarət etmişdir.
Nümayəndə heyətinin rəhbəri – Türk Xalqlarının Ümumdünya Assambleyasının birinci vitse-prezidenti, Dünya Azərbaycanlıları Konqresinin Asiya ölkələri üzrə sədr müavini, hüquq və tarix elmləri doktoru, Avropa Akademiyasının və Avropa Universitetinin professoru Yəhya Əliyev başda olmaqla, həmçinin Qazaxıstanda Yaşayan Azərbaycanlıların Etno-Mədəni İttifaqının prezidenti, tarix elmləri doktoru Vidadi Salahov daxil olmaqla 72 nəfərdən ibarət nümayəndə heyəti məlum səfəri təşkil etmişdir. Professor Yəhya Əliyev Şəhidin ailəsinə böyük ehtiram və məhəbbətini bildirərək onun etdiyi qəhrəmanlığı bütün dünya türklərinə misilsiz örnək və nümunə olduğunu vurğulamışdır: " Qəhrəman Mübariz Ağakərim oğlunun Azərbaycana, vətənimizə sonsuz məhəbbəti və sevgisi gənclər arasında minlərlə qəhrəmanların yetişməsinə təkan verəcəkdir. Bu istiqamətdə Qəhrəman haqqında Azərbaycandan kənarda da – Qazaxstanda, Qırğızıstanda, Özbəkstanda soydaşlarımız arasında yığıncaqlar keçirilmiş, onun etdiyi şücaət və cəngavərlik hərəkətinə yüksək milli qiymət verilmiş və vətən yolunda hamımızın canından keçməyimizə hazır olmağımız xüsusi qeyd edilmişdir.”
DAK fəxri sədri prof.Qulamrza Səbri Təbrizinin və Türk Xalqlarının Ümumdünya Assambleyasının (ВАТН) prezidenti akademik Yermentay Sultanmuradın səmimi qəlbdən göndərdiyi salamlarını, qəhrəmanımızla onların və bütün Türk Dünyasının fəxr etdiyini Şəhidin atası Ağakərim İbrahimova çatdıran professor Yəhya Əliyev Şəhidin artıq bütün Türk xalqlarının ümumi qəhrəmanları – Koroğlu, Babək, Koblandı Batır, Manas və digərlərinin yolunu davam etdiyini və vətən yolunda əsl Qəhrəman kimi canını fəda etdiyini qeyd etmişdir və onun aliləsinə başsağlığı yox, başucalığı diləmişdir. Şəhidin atası Ağakərim İbrahimov gələn ziyarətçilərə öz minnətdarlığını bildirərək oğlunu vətən yolunda fəda verdiyini, onunla ailəsi və bütün nəslinin fəxr etdiyini demişdir.
Hal-hazırda DAK və Türk Xalqlarının Ümumdünya Assambleyası (ВАТН) tərəfindən Milli Qəhrəman Şəhid Mübariz İbrahimovun xatirəsini əbədiləşdirmək istiqamətində Türk Dünyası Ölkələrinin, Türk Xalqlarının və bütün dünya ictimaiyyətinin qurumlarına Qəhrəman haqqında saytlara məlumatlar verilir. Onun qəhrəmanlığı haqqında plokatlar hazırlanmış, xatirə və vətənpərvərlik istiqamətində təbliğat üçün butün qurumlara və əhaliyə paylanılması təşkil olunmuşdur. Bundan başqa DAK Gənclər Təşkilatı tərəfindən Milli Qəhrəmanımızın Şəhid olduqdan sonra erməni tərəfdə qalmış cisminin geri qaytarılması istiqamətində səkkiz dildə bəyanat verilmiş və bütün beynəlxalq təşkilatlara göndərilmişdir. DAK İnformasiya Mərkəzi
|
